حجابة فخر

موضوع: حجابة فخر السبت يناير 03, 2009 7:53 am

حـﭽـاية ... فخر

عندي صاحب...
من يحـﭽـيلي أعله جَده
أقرَه بعيونَه الفخر
وسبحة الكهرب أبأيده...
وخرزَه ، خرزه
أيسمي أجداده لحد سابع ظهر
وجدَه كاتب للأمير...
وهاوِّي للصيد وكَنُص
مية سياف أبيمينه ...
ومية سياف أبيساره
وميه ، خَياله وراه
وجده من يطرّد غزاله...
أبسهم واحد...
أينيشن أيجيس الرماه
ومره حسيت أبسؤاله ، الكبرياء
ولأن زين أعرف أطباعه
نص أحاديثه رياء
كال سولفلّي أعله جدَك ؟
كتله آنه أملُـك هويتي
بيها أسمي وأسم أبويه
وأسم جدي وأسم أبوه
والعشيره ....
الماتقدم خبزه لحلوﮒ الجياع
ما يهم بيها الفقير
وبيتنه ، أمن الطين ...
وجذوع النخيل
وبنفس هذا سؤالك
كَتله بويه أبروح أبوك
تدري جَدي أشيشتغل ؟
ضحك حيل...
أمن الكَلب طلعت ضحكته
وكَال يا سبحان ربي
وبنفس هذا السؤال ، أسألت جدك
كال ، يمكن ﭽان راعي...
للسراكيل أبغنمهم
لو مزارع ...
يزرع أبكَيعان كتاب الأمير
وﭽان جدك ...
يبني ، أكثر من فقير
مامُلك كوخ اليلمه
وعلى أخدوده ...
أنطبعت آثار الحصير
وﭽانت الطيبه صفاته
والوطن دينَه وصلاتَـه
ولا مُلك كَبر المماته
ولا ترك ألنه أثر
كَتله بويه أجدادي عافولي حمل ...
كلش ثكَيل
راح انهض ...
وأحمل أعباء الرساله
وجَدّي بيَّ أيشيل راسه
وراح أعدلهم مآثر
خلفوا أجدادي شاعر
(بنفسي فخرتُ لا بجدودي)1
يكتب التاريخ بيده ...
ويصنع المجد الـﭽبير...
أيفرح أجداده أبكبرهم
شاعر ومهوال أبنهم
تجري بشفافه القصايد ...
أيعملِق القِـزم الزغير
ويصلِح السيره وسلوك
وللفخر أسمه يلوﮒ
كلما يتبدل خليفه
أيحصِل الأحسن وظيفه
أبصفة ...
...مداح الملوك
***
مع اجمل تحيااتي

للشاعر حامد كعيد

موضوع: رد: حجابة فخر الجمعة يوليو 17, 2009 4:57 am

والله رووووووووووووووووووووووووووووووووووووووووووووووعة

شكرا على المرور بارك اللة بيك نورت صفحتي